ވަގަށް އެތެރެކުރި ސިނގިރޭޓްތަކެއް ކަސްޓަމްސް އިން ހިފެހެއްޓީމާ ވެސް ވަގުންގެ އަތްދޮށުން ސަލާމަތެއް ނުކުރެވުނެވެ. ދެ ކޮންޓޭނަރުގައި ހުރި ޖުމުލަ 13.6 މިލިއަން ސިނގިރޭޓް ސްޓިކް އެމްޕީއެލް ހުޅުމާލޭ ބަނދަރުގައި ހުއްޓާ ވަގުން ވަދެ އެތަން ވެސް ލޫޓުވާލައިފި އެވެ.
މިފަދަ ބޮޑެތި ވައްކަމުގެ ޖަރީމާތައް އެތަނުގައި ތިބޭ މުވައްޒަފުންގެ އެހީތެރިކަމާ ނުލާ ހިންގާކަނަށް ފަސޭހައެއް ނުވާނެ އެވެ. ކަންވީ ވެސް ހަމަ އެހެންނެވެ. އެތަނުގެ ވެރިންގެ ފެންވަރުގެ މުވައްޒަފުންގެ ބައިވެރިވުން އޮތް ކަމަށް ތުހުމަތު ކުރެވޭ އެމްޕީއެލްގެ ހަ މުވައްޒަފަކު ސަސްޕެންޑް ވެސް ކޮށްފި އެވެ.
ރާއްޖޭގެ މައި ގޭޓު ބަލަހައްޓާ އެމްޕީއެލުން މިއަދު ނެރުނު ބަޔާނެއްގައި ބުނީ މި މަހުގެ 8 ވަނަ ދުވަހު މި މައްސަލަ ފެންމަތިވުމާ އެކު، ތަހުގީގު ފަށައި މިދިޔަ އާދިއްތަ ދުވަހު ފަސް މުވައްޒަފަކު ސަސްޕެންޑްކޮށްފައިވާ ކަމަށެވެ. އަދި އިތުރު މުވައްޒަފަކު މިއަދު ސަސްޕެންޑް ކޮށްފައިވާ ކަމަށެވެ.
އެ ކޮންޓެއިނަރުތައް ވަގަށް ނެގުމަށް ރާވައި ތަންފީޒުކުރުމުގައި އިސްކޮށް ހަރަކާތްތެރިވި ކަމުގެ ތުހުމަތުގައި ހަތަރު މީހަކު ކޯޓު އަމުރެއްގެ ދަށުން ރޭ ވަނީ ފުލުހުން ހައްޔަރުކޮށްފަ އެވެ. އޭގެ ތެރޭގައި ހިމެނެނީ އެޕޯލޯގެ ވެރިޔާ ވަހީދު (ދިގަލި) އާއި ލޮޓަސްގެ ވެރިޔާ އަހުމަދު އާރިފް (އާއްޓޭ) އާއި ކަސްޓަމްސްގެ އިސް މުވައްޒަފެއް ކަމަށްވާ ޒިވާރު އިސްމާއިލްގެ އިތުރުން މިފްކޯގެ މިހާރުގެ ޖެނެރަލް މެނޭޖަރ، އިންޖިނިއަރިން ޕްރޮޖެކްޓްސް މުއާޒް އަލީ އެވެ. މުއާޒް އަލީ އަކީ ކަސްޓަމްގެ ކުރީގެ ސީނިއަރ ސުޕްރިންޓެންޑެންޓެކެވެ.

ކިޔުންތެރިންގެ ހިޔާލު