ތެލާއި ގޭހުގައި އެމެރިކާގެ ބޮޑު ނަމެއްކަމުގައިވާ ވިޓޯލް އަކީ ތެލުގެ ބިޑުތަކެއް ކާމިޔާބުކުރުމަށް ރިޝްވަތާ ޞައްޙަ ނޫން ލިޔެކިޔުންތައް ބޭނުންކުރިކަމުގެ ކުއް ސާބިތުވެފައިވާ ބައެއް ކަމުގައި އެމެރިކާގެ ޖަސްޓިސް ޑިޕާޓްމަންޓުން ވަނީ އާންމުކޮށްފައެވެ. ވިޓޯލް އަކީ މިހާރު ރާއްޖޭގައި ބަންކަރިން ޚިދުމަތް ދިނުމަށް އެސްޓީއޯ އާއެކު ވިޔަފާރީގެ އެއްބަސްވުން ހަދާފައިވާ ބައެކެވެ.

ޔޫއެސް ޑިޕާޓްމަންޓް އޮފް ޖަސްޓިސްގެ ރަސްމީ ވެބްސައިޓްގައި 22 އޮގަސްޓް 2024 ގައި ޝާޢިއު ކޮށްފައި ވާގޮތުން މެކްސިކޯއިން ތެލުގެ ބިޑެއް ކާމިޔާބުކުރުމަށްޓަކައި މެކްސިކޯގެ ސަރުކާރު ޙިއްސާވާ ކުންފުންޏެއްގެ ކަމާ ގުޅޭ އިސް ދެމުވައްޒަފަކަށް ރިޝްވަތުގެ ގޮތުގައި 600،000.00 ( ހަލައްކަ) އެމެރިކާ ޑޮލަރު ދީފައި ވާކަމަށާއި، ޞައްޙަ ނޫން ލިޔެކިޔުންތައް ހުށަހަޅާފައި ވާކަމަށް ކޯޓް ލިޔުންތަކުން ސާފުވާކަމަށެވެ.

ވިޓޯލްގެ އިސްވެރިއެއް ކަމަށްވާ ޒަވިއާ އަގިލާގެ މައްޗަށް ކޯޓުގައި ސާބިތުވެފައިވާ ރިޝްވަތުގެ މައްސަލައިގެ އިސްތިޢުނާފަށް ފަހު އެމެރިކާގެ ޕްރިންސިޕަލް ޑެޕިއުޓީ އެސިސްޓެންޓް އެޓާނީ ޖެނެރަލް ވިދާޅުވެފައި ވަނީ އަގިލާގެ ޤާނޫނާ ޚިލާފަށް ނާޖާއިޒު ގޮތުގައި ވިޓޯލްއަށް އެތައް މިލިޔަން ޑޮލަރެއްގެ މަންފާ ލިބޭ ކޮންޓްރެކްޓްތައް ކާމިޔާބު ކޮށްދީފައި ވާކަމަށާއި، މިހާރު ދެން ޖެހޭނީ އެކަމުގެ އަގު އަދާކުރަން ކަމަށެވެ.

ޒަވިއާ އަގިލާގެ އިސްތިޢުނާފުގައި ވެސް ވަނީ އޭނާގެ މައްޗަށް ރިޝްވަތުގެ ކުއް ސާބިތުވެފައެވެ. އެގޮތުން ޖަލު ޙުކުމުގެ އިތުރުން 7 މިލިޔަން ޑޮލަރުގެ ޖޫރިމަނާ ދެއްކުމަށް ވަނީ ޙުކުމްކޮށްފައެވެ. މީގެ އިތުރުން ވެސް މަނީ ލޯންޑަރިންގެ އާއި އެހެނިހެން އެތަކެއް ޖަރީމާތަކާ ގުޅޭ ޝަރީޢަތްތައް މިހާރު ވެސް ކޯޓުގައި ހިނގަމުންދާ ކަމަށާއި، މަނީ ލޯންޑަރިންގެ ކުއް ސާބިތުވެއްޖެ ނަމަ 20 އަހަރުގެ ޖަލުޙުކުމެއް އަންނާނެކަމަށާއި، އަދި އެހެނިހެން މައްސަލަތަކުގެ ތެރެއިން ކޮންމެ ވަކި މައްސަލައަކަށް އިތުރު 5 އަހަރުގެ ޖަލުޙުކުމެއް އޭނާގެ މައްޗަށް އަންނާނެއެވެ.