މިލައުތުރު ފުޓްސަލް މުބާރާތުގައި މިރޭ ކުޅުނު ޑީ ގްރޫޕުގެ އެންމެ ފަހު މެޗުގައި ފޯކައިދޫ އާއި ނަރުދޫ ބައްދަލުކުރި މެޗް 2 – 1 ގެ ނަތީޖާއަކުން ފޯކައިދޫ ކާމިޔާބުކޮށް ކުއާޓަރ ފައިނަލުން ޖާގަ ކަށަވަރު ކޮށްފި އެވެ.
ފޯރި ގަދަ ކުޅުމެއް ފެނިގެންދިޔަ މެޗުގައި ދެ ޓީމަށް ވެސް ލަނޑު ޖަހާނެ ފުރުސަތުތަކެއް ލިބިފައި ވެއެވެ. އަދި ވަކިން ޚާއްސަކޮށް ފޯކައިދޫ ޓީމުން ބާރު ޝޮޓުތަކެއް ނަރުދޫގެ ގޯލަށް ފޮނުވާލާފައި ވެއެވެ.
ފޯކައިދޫ ޓީމަށް ފުރަތަމަ ލަނޑު ޖަހައިދިނީ ޖޯޒީ ނަންބަރު 31 މާލިކެވެ. އަދި ދެވަނަ ލަނޑު ކާމިޔާބު ކޮށްދިނީ ޖޯޒީ ނަންބަރު 8 އަޙްމަދު ޝަމާލެވެ. މެޗުގެ މޮޅު ކުޅުންތެރިޔާގެ މަގާމު ލިބުނީ ވެސް ޝަމާލަށެވެ.
ފަހު ހާފުގެ އެންމެ ފަހު ވަގުތުކޮޅުގެ ތެރޭގައި ނަރުދޫ ޓީމުން ގޯލެއް ކާމިޔާބުކުރެވޭތޯ ވަރަށް މަސައްކަތް ކުރިއެވެ. އެހެން ނަމަވެސް މެޗުގެ ފުރިހަމަ ވަގުތު ހަމަވިއިރު އިތުރު ލަނޑެއް ކާމިޔާބު ނުކުރެވި، މެޗު ކާމިޔާބުކުރީ ފޯކައިދޫ އެވެ.
މި މެޗުން ފޯކައިދޫ މޮޅުވުމުން ކުއާޓަރ ފައިނަލުން ޖާގަ ކަށަވަރުވީ އެވެ. އަދި ނަރުދޫ މުބާރާތުން ކެޓީއެވެ.
ކިޔުންތެރިންގެ ހިޔާލު