ފުލުސް އޮފީހުގައި ހުރި ކޮރަޕްޝަންގެ ބޮޑެތި މައްސަލަތަކަކާ ގުޅިގެން ކޮމިޝަނަރު އިސްމާއިލް ނަވީން ވެސް ހިމެނޭހެން ފުލުހުންގެ އިތުރު 6 އޮފިސަރުން ސަސްޕެންޑުކުރަން ހުށަހަޅަން މާލިއްޔަތު ކޮމިޓީން މިއަދު ފާސްކޮށްފި އެވެ.
ރައްޔިތުންގެ މަޖިލިސްގެ މާލިއްޔަތު ކޮމިޓީން މިގޮތަށް ފާސްކުރީ މިއަދު ބޭއްވި އެ ކޮމިޓީގެ ސިއްރު ބައްދަލުވުމެއްގަ އެވެ. އަދި އެ ގޮތަަށް ފާސްކުރަންޖެހުނީ ފުލުހުންގެ ވެލްފެއާ ކުންފުނި ކަމުގައިވާ ޕޮލްކޯ އާއި އެހެނިހެން ބައެއް ކަންކަމާ ގުޅޭ ކޮރަޕްޝަންގެ ތުހުމަތުތަކަކާ ގުޅިގެންނެވެ.
ސަސްޕެންޑު ކުރަން ހުށަހަޅަން މާލިއްޔާތު ކޮމީޓީން ފާސްކުރީ ފުލުސް އޮފީހުގެ އެންމެ އިސް 7 ފަރާތެވެ. ނަމަވެސް މިއީ ސިއްރު ބައްދަލުވުމަކަށް ވާތީ ތަފުސީލުތައް ވަނީ ސިއްރު ކޮށްފައެވެ. ސަސްޕެންޑު ކުރަން ހުށަހަޅަން ނިންމީ؛
1- ޕޮލިސް ކޮމިޝަނަރު އިސްމާއިލް ނަވީން
2- ސުޕްރިންޓެންޓް އޮފް ޕޮލިސް އިސްމާއިލް ޝަމީމް (އިންޓެލް ހެޑް)
3- އެސިސެންޓް ކޮމިޝަނަރު އަހުމަދު އަބްދުއްރަހުމާން
4- އެސިސްޓެންޓް ކޮމިޝަނަރު މޫސާ އަލީ
5- އެސިސްޓެންޓް ކޮމިޝަނަރު މުހައްމަދު ބަޝީރު
6- އެސިސްޓެންޓް ކޮމިޝަނަރު މުހައްމަދު ދާއޫދު
7- އެސިސްޓެންޓް ކޮމިޝަނަރު މުހައްމަދު ރަޝީދު
މަލިއްޔާތު ކޮމިޓީގެ ރިޕޯޓު އަދި މަޖިލިހުގެ ތަޅުމުން ފާސްކުރަން ޖެހޭކަމަށް ވެސް ނިންމާފައި ވެއެވެ. އެހެންކަމުން ސީޕީ ނަވީނާއެކު އަނެއް 6 އޮފިސަރުން ސަސްޕެންޑު ކުރެވޭނީ ނުވަތަ ފިޔަވަޅެއް އެޅޭނީ މަޖިލިހުގެ ތަޅުމުން ފާސްކޮށްގެންނެވެ.
ބައެއް މީހުން ބުނާގޮތުގައި ފުލުސް އޮފީހުގެ އެންމެ އިސްވެރިންތަކެއްގެ މައްޗަށް ފިޔަވަޅު އެޅުމުގެ ފުރުސަތެއް އެމީހުން ނުދޭނެއެވެ. ނުފޫޒުތައް ބޭނުންކޮށްގެން ނިންމުންތައް ބަދަލުކުރާނެ އެވެ.
ކިޔުންތެރިންގެ ހިޔާލު