ފާޑުކިއުންތަކާ މަލާމާތްތައް އެންމެ ގިނައިން ރައްދުވާ ސިޔާސީ އެއް ބޭފުޅަކީ ކޮމަންޑޫ ދާއިރާގެ ކުރީގެ މެންބަރު މުޙައްމަދު ރާޝިދު (ރާޑޯ) އޭ ދެންނެވުމަކީ ކުށަކަށް ނުވާނެއެވެ. އެހެން ނަމަވެސް ސިޔާސީ މަސައްކަތުގެ ތެރެއިން މިހާތަނަށް ކުރިމަގު ހޯދުނު ފަރާތެއް ވެސް ށ. އަތޮޅުގައި އެނޫނީ ނެތެވެ.
މިއަދު ސިޔާސީ މަޤާމެއް ނެތަސް، ޕާޓީއެއްގައި އިސް ދައުރެއް ނެތަސް، އޭނާ އެހުރީ ގުޑު ގުޑު ނާޅާ ވަރަށް ފުރިފައެވެ. ސިޔާސީ ގޮތުންނާއި ޒާތީ ގޮތް ގޮތުން ވިއްދާލި މީހުން ތިބީ އަމިއްލައަށް ކޮފީ ގިރަން ކެޔޮވަލުގައި ކުޑަ ޖަހައިގެންނެވެ. އަދި އެފަދަ ފަރާތްތަކަށް ވީކަމެއް ހަރާމުން ހަރާމެވެ. މިއަދުގެ ޙަޤީޤަތަކީ މުދާކޮޅެއް ގެންދާން ވެސް، ސްޕޮންސާގެ ގޮތުގައި ފައިސާ ފޮއްޗެއް ހޯދާން ވެސް، ބޮޑު ކެމްޕެއިނެއްގައި ގިނަ ބަޔަކު ރަށަކަށް ދާންޖެހުމުން ވެސް ދާން ހުރީ ހަމަ އެއްކަލަ ރާޑޯއެވެ.
އެމްޕީ ރާޑޯ އަކީ ފޯކައިދޫގެ ތާރީޚުގައި ކާމިޔާބު ސިޔާސީ ލީޑަރެއްގެ ގޮތުގައި ނަން ލިޔެވިގެންދާނެ މީހެއް ކަން ޔަޤީނެވެ. ފޯކައިދޫ ކައުންސިލުން ފެށި ސިޔާސީ ކެރިއާ ނިންމާލާފައި ވަނީ ދިވެހިރާއްޖޭގެ ޤާނޫނު ހަދާ މަޖިލީހުގެ ރަންގޮނޑި ކާމިޔާބު ކުރެއްވުމަށް ފަހުގައެވެ. އަދި އެ ގޮނޑިކޮޅުގެ އަގު ބާޒާރުގައި އުފުލިގެންދިޔަ އެންމެ ރަނގަޅު ވަގުތުގައި ވިއްކާލައި، 13 މިލިޔަން ރުފިޔާގެ އަގުހުރި ބޯޓެއް ވުޖޫދުކުރުމަށް ފަހުގައެވެ. މިހާރު ރާޑޯ ހުރީ އިހުނަށް ވުރެ ބޮޑަށް ބިމުގައި ހަރުލާފައެވެ.
ކިޔުންތެރިންގެ ހިޔާލު