ނިމިދިޔަ އެމްޑީޕީ ސަރުކާރުގެ ދަނޑުވެރިކަން ތަރައްޤީކުރުމުގެ ޤައުމީ ސިޔާސަތުގެ ދަށުން ދަނޑުވެރިކަން ތަރައްޤީކުރުމާ ބެހޭ ދައުލަތުގެ ކުންފުނިކަމަށްވާ އެގްރޯނެޓުން ލ.އިސްދޫގައި އެޅި ކޮމިއުނިޓީ ފާރމް މިއަދު ރަސްމީކޮށް ހުޅުވައިފިއެވެ.
ފަނޑުވަމުންދާ ދިވެހިރާއްޖޭގެ ދަނޑުވެރިކަން ކޮޅަށް ޖެހުމުގެ މަޤުސަދުގައި ކުރީ ސަރުކާރުން ވަނީ މިކަމަށް ބޭނުންވާ ފަންޑް ޖަޕާނު ސަރުކާރުން ހޯދާފައެވެ. އަދި ރާއްޖޭގެ އެކި ސަރަޙައްދުގައި 5 ދަނޑު ތަރައްޤީކުރުމަށް ބޭނުންވާނެ ހުރިހާ ސާމާނެއް ވަނީ ހޯދާފައެވެ. އަދި މީގެ އިތުރުން ޑިސްޓްރިބިއުޝަން ސެންޓަރުތަކާއި، ތަކެތި އުފުލުމަށްޓަކައި 65 ފޫޓުގެ އުޅަނދަކާއި 45 ފޫޓުގެ އުޅަނދެއް ވެސް ވަނީ ބަނދެ ނިންމާފައެވެ.
މިއީ ކުރީ ސަރުކާރުން ތަޢާރަފުކުރި މުޅިން އާ ދަނޑުވެރިކަމުގެ ކޮންސެޕްޓެކެވެ. މި ކޮންސެޕްޓްގެ ދަށުން 100،000 އަކަފޫޓުގެ ދަނޑުބިން ތަރައްޤީކުރުމަށް ކަނޑައަޅައި، ބޭނުންވާ ހުރިހާ ތަކެއްޗެއް ވަނީ ގުދަންކޮށްފައެވެ. ސަރުކާރު ބަދަލުވުމާއެކު މަސައްކަތް ހުއްޓި ދިގުލައިގެންދިއުމުގެ ސަަބަބުން ޑޯނަރ ފަންޑިންގ ކެންސަލްކުރުމުގެ އިންޒާރާއެކު އިސްދޫ ދަނޑުގެ މަސައްކަތް ފަށައި، ދެ އަަަހަރު ފަހުން އެ ވަނީ ހުޅުވާފައެވެ.
އިސްދޫ ކޮމިއުނިޓީ ފާރމް ރަސްމީކޮށް ހުޅުވުމަށްޓަކައި ބޭއްވި ކުޑަ ޙަފުލާގައި އިސްދޫ ދާއިރާގެ ރައްޔިތުންގެ މަޖިލިސްގެ ޢިއްޒަތްތެރި މެންބަރ އިސްމާޢީލް ޝަފީޢާއި، އެގްރޯނެޓްގެ މިހާރުގެ މެނޭޖިންގ ޑިރެކްޓަރ ޙުސައިން ދީދީ ބައިވެރިވެ ވަޑައިގަތެވެ. އަދި އިސްދޫގެ ދަނޑުވެރިންގެ ތެރެއިން ކޮމިއުނިޓީ ފާރމުން ދަނޑު ލިބުނު ފަރާތްތަކަށް އެކަމުގެ ލިޔުން ޙަވާލުކޮށްފައި ވެއެވެ.
ކިޔުންތެރިންގެ ހިޔާލު