ސަރުކާރުން ތަކުރާރުކޮށް ވަޢުދުވަމުން ގެންދެވި ގޮތަށް ދިރާސީ އައު އަހަރު ފެށުމުގެ ކުރިން ރާއްޖޭގެ ހުރިހާ ސްކޫލްތައް އޭސީކޮށް “ކޫލް ސްކޫލް” ތަކަކަށް ހެދުމަށް ވެވަޑައިގެންފައިވާ ވަޢުދުފުޅު ނުފުއްދެވުނެވެ.
އައު އަަހަރުގެ ކިޔެވުން 27 ޖެނުއަރީގައި ފެށިގެންދިޔަ އިރު، އޭސީ ފޮނުވިފައިވަނީ ވެސް މަދު ސްކޫލަކަށެވެ. އޭސީ ފޮނުވުނު މަދު އަދަދެއްގެ ސްކޫލަށް ވެސް އޭސީތައް އަޅުވައި ކުލާސްތައް ފިނިކުރެވޭ ގޮތެއް ނުވިއެވެ.
އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢަށް ރައީސުލްޖުމްހޫރިއްޔާގެ ވަޢުދުފުޅު ފުރިހަމައެއް ނުކޮށްދެވުނެވެ. ތާރީޚުތައް އެކި ފަހަރު މަތިން ބަދަލުކޮށްގެން ވެސް އެބުނާ އަރާމު ސްކޫލްތަކެއް ނުދެއްކެވުނެވެ.
ލޯކަލް ކައުންސިލްތަކުގެ އިންތިޚާބާ ދިމާކޮށް އޭސީ ކޮޅެއް ބަހާލުން ފިޔަވައި އަދި ހަމަ އެއްވެސް ކަމެއް ޙަޤީޤީ ވަޢުދު ފުއްދެވުމަށް ކުރެވުނުތަނެއް ނުފެނެއެވެ.
އެޑިޔުކޭޝަން މިނިސްޓްރީ ފާހަގަކުރެވެނީ ރައްޔިތުންގެ ފާޑިކިއުން އެންމެ ބޮޑަށް އަމާޒުވާ ދައުލަތުގެ އެއް ވުޒާރާގެ ގޮތުގައެވެ. ސިޔާސީ ބައެއް އިސް ވެރިން ތިއްބަވަނީ ސޯޝަލް މީޑިއާގައި މީހުންނާ ޒުވާބުކުރާށެވެ.
ކިޔުންތެރިންގެ ހިޔާލު